La Finba cumple diez años como una "xoya" al marxe del vaivén políticu" según Barbón

Ignacio Villaverde asegura que la fundación ye unu de los "exemplos más granibles de collaboración pública y privada"

La Fundación pa la Investigación y l'Anovación Biosanitaria del Principáu d'Asturies (Finba) cumplió'l so décimu aniversariu siendo una "incubadora y aceleradora de talentu" y una "xoya que tien de ser caltenida de cualquier vaivén políticu pa que nun se repitan los socesos qu'atayaron el primer intentu pa ponela en marcha".

Asina lo señaló esti xueves el xefe del Executivu autonómicu, Adrián Barbón, nel actu de celebración de los diez años dende la puesta en marcha de la Finba, que cunta anguaño con 64 grupos d'investigación activos qu'axunten alredor de 1.000 profesionales.

Barbón aseguró que la fundación asitia "Asturies a la vanguardia de la investigación biomédica n'España" y garantizó'l sofitu del Gobiernu rexonal a una organización que nació en 2014 p'acomuñar la "masa crítica" qu'axunta tola rede sanitaria, col envís de que fuera alantre l'anovación, la investigación y el desenvolvimientu tecnolóxicu "en beneficiu de tol Principáu".